Алтан унжлагат хэмээх гал тахиа жилийн сар шинийн золголтыг Соёлын төвд зохион байгуулж сумын ИТХ-ын дарга С.Гонгор, сумын Засаг дарга Д.Цэдэнсодном нар нээж Өлзийт сумын бүтээлч хөдөлмөрч иргэддээ “АЛТАН УНЖЛАГАТ” хэмээх ГАЛ ТАХИА жилийн сар шинийн мэндийг хүргэж айл хотлоороо амар амгалан, аз хийморь, амжилт бүтээл бялхаж байхын өлзий дүүрэн ерөөлийг өргөн дэвшүүлж, Өлзийтчүүдийн босоо цагаан хийморь ашид мөнхөд өөдөө дээшээ байж, элгээрээ энх амгалан, төрлөөрөө түвшин амгалан байх болтугай хэмээн мэндчилж, соёлын төвийн хөгжмийн багш Дөлгөөнзориг төрийн хуурыг эгшиглүүлэн, Гангандандэдлэн хийдийн лам нар хийморийн сан тавьсанаар эхэллээ. "Сумын хөдөлмөрийн аварга"-аар Сайн-Оюут сургуулийн багш Д.Цэрэн, 4 дүгээр багийн малчин Б.Цэрмаа, Бүртгэл статистикийн тэргүүний ажилтан цол тэмдэгээр 5 дугаар багийн малчин Т.Доржготов, "Байгууллагын хөдөлмөрийн аварга"-аар төрийн сангийн мэргэжилтэн Г.Ганчимэг нар шалгарч энэхүү бэлгэтэй сайхан өдөр шагналаа гардан авлаа. Мөн "Аймгийн хөдөлмөрийн аварга"-аар 1 дүгээр багийн Засаг дарга С.Лувсанцэрэн, "Аймгийн сайн малчин" цол тэмдгээр 2 дугаар багийн малчин Баатарсүрэнгийн Цэвээндорж, 3 дугаар багийн малчин Сорогдонгийн Эрдэнэбаатар, 4 дүгээр багийн малчин Рүүбазарын Батцэнгэл, "Аймгийн шинэ хот айл"-аар 2 дугаар багийн малчин Баатарсүрэнгийн Бат-Олдох нар шагнууллаа.