Их Монгол улс байгуулагдсаны 809 жил, Ардын хувьсгалын 94 жилийн ойг тохиолдуулан сумын баяр наадмыг 2015 оны 07 дугаар сарын 04-ний өдөр Гурван овоонд амжилттай зохион байгууллаа. Сумын баяр наадмыг нээж сумын ИТХ-ын дарга Б.Өлзийбаатар, сумын Засаг дарга Д.Цэдэнсодном нар сумын ард иргэд, наадамчин олондоо баярын мэндийг дэвшүүлж сайхан наадахыг хүсч үг хэллээ. Энэ жилийн наадамд аймгийн арслан Баянмөнх, Бат-Амгалан, аймгийн харцага Энхбаатар, Уламбаяр тэргүүтэй 100 бөх барилдаж уран мэх, хүч чадлаа уралдуулан шөвгийн дөрөвт аймгийн начин Мөнхтөр, тус сумын харьяат аймгийн начин Амгаланбаатар, мөн сумын харьяат сумын харцага Амгаланбаатар, Баянговь сумын харьяат залуу бөх Норов нар үлдэн барилдаж Өлзийт сумын харьяат сумын харцага Амгаланбаатар түрүүлж "Сумын заан" цол, залуу бөх Норов үзүүрлэн "Сумын харцага" цол тус тус хүртлээ. Сур харваанд аймгийн мэргэн 5, спортын мастер 1, нийт 32 харваач, хүүхдийн харваанд 10 хүүхэд оролцож цэц мэргэнээ сорьсоноос эрэгтэй сурд Галуут сумын харьяат спортын мастер Ц.Чагнаадорж тэргүүн байр, Баянбулаг сумын харьяат аймгийн мэргэн Д.Солонго дэд байр, Баацагаан сумын харваач Б.Лхамсүрэн гуравдугаар байр, эмэгтэй сурд Бөмбөгөр сумын харьяат аймгийн дархан мэргэн Н.Наранжаргал тэргүүн байр, Баян-Овоо сумын харьяат аймгийн мэргэн С.Ариунтуяа дэд байр, Баянбулаг сумын харваач Б.Жаргалмаа гуравдугаар байр, хүүхдийн харваанд Даваадулам тэргүүн байр, Уранчимэг дэд байр, Ц.Мөнх-Уянга гуравдугаар байрыг тус тус эзэлсэн байна. Гурван овоонд болсон сумын баяр наадмын хурдан морины уралдаан 6 насны ангилалаар нийт 257 хурдан буян шандас хүчээ сорин уралдсанаас төрлөөр авч үзвэл азарга 25, их нас 56, соёолон 35, хязаалан 48. шүдлэн 47, даага 46 уралдаж торгон тоосоо өргөсөн байна. Азарганы түрүү магнайг тус сумын 2 дугаар багийн малчин, аймгийн алдарт уяач Д.Батбаярын Хонгор, аман хүзүүг 2 дугаар багийн малчин, аймгийн алдарт уяач Д.Мөнхсуурийн Халиун, гуравт 4 дүгээр багийн малчин Д.Равдандоржийн Хүрэн, дөрөвт 2 дугаар багийн малчин Д.Отгонбаярын Хонгор, тавтд 4 дүгээр багийн малчин Б.Амарбаярын Хээр, Их насны түрүү магнайг Заг сумын Д.Батсайханы Буурал, аман хүзүүг 4 дүгээр багийн малчин Д.Равдандоржийн Ухаа, гуравт 4 дүгээр багийн малчин Б.Бямбацогтын Ухаа, дөрөв, тавд Богд сумын аймгийн алдарт уяач Ж.Ганхүлэгийн Хээр, Шарга халзан, Соёолонгийн түрүү магнайг Баянлигийн Мөнхнасангийн Зээрд халзан, аман хүзүүг Өлзийт сумын 2 дугаар багийн малчин, аймгийн алдарт уяач Д.Мөнхсуурийн Зээрд халзан, гуравт Нарийнтээл сумын Сосорбарамын Хонгор, дөрөвт Заг сумын Батсайханы Хул, тавд Өвөрхангайн Гучин ус сумын Гэлэгбармидын Сувдан цагаан, Хязаалангийн түрүү магнайг Гэлэгбармидын Зоос бор, аман хүзүүнд Өлзийт сумын 2 дугаар багийн малчин, аймгийн алдарт уяач Д.Батбаярын Хул, гуравт 4 дүгээр багийн малчин Г.Цэдэнсодномын Хээр, дөрөвт Баян-Өндөр сумын аймгийн алдарт уяач Пүрэвсүрэнгийн Саарал, тавд Баянхонгор сумын Б.Бат-Ирээдүйгийн Халтар, Шүдлэнгийн түрүү магнайг Баян-Өндөр сумын Пүрэвсүрэнгийн Бор, аман хүзүүнд 2 дугаар багийн малчин Б.Цэвээндоржийн Хондон, гуравт 2 дугаар багийн малчин Д.Отгонбаярын Хул, дөрөвт 6 дугаар багийн иргэн С.Гонгорын Сарт бор, тавд 2 дугаар багийн малчин Б.Цэнгэлийн Хээр, Дааганы түрүү магнайг Өвөрхангайн Гучин ус сумын Гэлэгбармидын Босоо хээр, аман хүзүүг 2 дугаар багийн малчин, аймгийн алдарт уяач Д.Батбаярын Хул, гуравт Баян-Өндөр сумын аймгийн алдарт уяач Пүрэвсүрэнгийн Хээр, дөрөвт Өвөрхангайн Хайрхан дулаан сумын Пүрэвцэрэнгийн Хээр, тавд 2 дугаар багийн малчин Д.Отгонбаярын Хонгор тус тус хурдалж торгон жолоогоо өргүүлсэн байна. Ийнхүү Гурван овоонд болсон сумын баяр наадам зохион байгуулалтын өндөр түвшинд болж өндөрлөлөө.