Тус сумаас сонгогдсон УИХ-ын эрхэм гишүүн, УИХ-ын дарга Г.Занданшатарын дэмжлэгтэйгээр "Иргэдийн оролцоотойгоор сумаа шинэчилье" төсөл Баянхонгор аймгийн Өлзийт суманд хэрэгжихээр болсон. Улсын төсвийн хөрөнгө оруулалтаар нутгийн удирдлагын ордон, сургууль, цэцэрлэг шинээр баригдаж, эмнэлэг шинэчлэгдэж байна. Сумаараа дулаан, цэвэр, бохирын нэгдсэн сүлжээнд холбогдож, хотынхтой адил нөхцөлд амьдрах нөхцөл бүрдэж, загвар сум болох зорилтыг дэвшүүлсэн "Иргэдийн оролцоотой-Сумаа шинэчлэх" төслийн анхны хэлэлцүүлэг өнөөдөр сумын Соёлын төвд боллоо. Хэлэлцүүлэгт УИХ-ын дарга Г.Занданшатар, аймаг, сумын удирдлагууд болон зураг төсвийг боловсруулахаар шалгарсан "Сонголт дизайн" компанийн ажлын хэсгийнхэн сумын ард иргэдтэй уулзаж анхны зургийг танилцууллаа. Мөн энэ үеэр УИХ-ын даргын нэрэмжит "Иргэдийн оролцоо-Сумын төвийн шинэчлэлт" сэдэвт эссэ бичлэгийн уралдаанд амжилттай оролцсон иргэдийг шагнаж урамшууллаа. Одоо иргэн бид нутгаа өөд татах нэгэн сэтгэлээр гар бие оролцож, харилцаа, хандлагадаа өөрчлөлт гаргаж, сумандаа сайхан амьдарцгаая.