“Гэр бүлийн үнэ цэнэ” сэдэвт залуу гэр бүлийн чуулган 2018 оны 10 дугаар сарын 31-ний өдөр зохион байгуулж нийт 128 иргэн оролцлоо. Чуулган хөтөлбөрийн дагуу зохион байгуулагдлаа. Чуулганыг нээж сумын Засаг дарга Д.Цэдэнсодном үг хэлж, аймгийн Политехникийн коллежийн удирдлагууд оролцож “Мэргэжилтэй-Малчин” үнэмлэхийг 28 иргэнд гардууллаа. Оролцсон хүмүүст зориулан политехникийн оюутнууд урлагийн тоглолтоо үзүүлж, хуулийн гарын авлагуудыг тусгайлан бэлтгэж тараалаа. Мөн чуулганд оролцсон залуу гэр бүлийн төлөөлөл болох саяхан хуримаа хийсэн 2 дугаар багийн малчин Мөнхсуурийн Сандуйжав, Тувааны Отгонбаяр нараар “Гэр бүлийн тангараг”-ийг уншуулан чуулганд оролцсон гэр бүлүүд даган уншиж гарын үсэг зурж, тулганд гал бадраалаа. Шинээр гэр бүл болсон М.Сандуйжав, Т.Отгонбаяр нарт сумын Засаг дарга Д.Цэдэнсодном гэрлэлтийн батлахыг ёслол төгөлдөр гардуулж өглөө. Залуу хосод ИТХ-ын Тэргүүлэгч Ц.Дашдэмбэрэл сумын ИТХ-ын даргын хүндэтгэлийг гардууллаа. 

Гэр бүл байхын утга учир сургалтыг багш Х.Пүрэвбаатар, “Боловсролтой иргэн гэр бүлийн үнэ цэнэ”, “мэргэжил сонгоход эцэг, эхийн үүрэг оролцоо” сургалтын сургалтын мененжер Б.Өлзийбаатар, Хүүхдээ эерэг аргаар хүмүүжүүлэх сэдвээр цэцэрлэгийн эрхлэгч Б.Баттулга,  Гэр бүлийн үнэ цэнэ сэдвээр цэцэрлэгийн явуулын багш Д.Насанбаяр, “Эрүүл амьдрал, гэр бүлийн үнэ цэнэ” сэдвээр ЭМТ-ийн дарга А.Сүхээ, Гэр бүлийн хүчирхийлэлтэй тэмцэх тухай хуулиар нийгмийн бодлогын ажилтан Б.Хүрэлбаатар, Замын хөдөлгөөний шинэчлэгдсэн дүрмийн талаарх сургалтыг хэсгийн төлөөлөгч Т.Намжилдорж нар хичээл заалаа.

Залуу гэр бүлийн чуулганд оролцсон иргэдтэй сумын удирдлагууд уулзан чөлөөт ярилцлагыг хийж тэдний санаа бодлыг сонслоо. Залуучуудаас гаргасан санал санаачилгыг орон нутгийн түвшинд хэрэгжүүлэхэд залуучууд та бүхний оролцоо маш чухал гэдгийг Засаг дарга онцлон хэлж байлаа. Ийнхүү чуулганд оролцсон залуучуудын 100 хувийн саналаар “Залуучуудын шинэ жил”-ийг зохион байгуулахаар боллоо. “Залуу насаа хайрлая” сэдэвт концертыг сумын Соёлын төвөөс зохион байгууллаа. 

Чуулганд оролцсон залуу гэр бүлүүдийн дунд “Буухиа” тэмцээнийг эрүүл мэндийн төвийн нийгмийн ажилтан Ү.Баттулга, сургуулийн нийгмийн ажилтан Э.Тогтох нар зохион байгуулж 3 дугаар багийн залуучууд 1-р байр, 4 дүгээр багийн залуучууд 2-р байр ,1 дүээр багийн залуучууд 3-р байрт шалгарч дурсамж, мөнгөн шагналаар шагнагдлаа.

Энэхүү чуулганы арга хэмжээг зохион байгуулахад сумын ИТХ, ЗДТГ, Нийгмийн түншлэлийн багийн хамт олон идэвхтэй оролцлоо.