Отроор өвөлжиж, хаваржиж байгаа нийт малчдаар орох ажлыг сумаас зохион байгууллаа. Шаргалжуут, Эрдэнэцогт сумын чиглэлд 39 өрхөөр сумын Засаг даргаар ахлуулсан ажлын хэсэг, Жинст, Шинэжинст, Баянговь, Богд, Баянлиг сумдад өвөлжиж байгаа 64 өрхөөр Засаг даргын орлогчоор ахлуулсан ажлын хэсэг, Өвөрхангай аймгийн Уянга, Төгрөг, Тарагт, Гучин ус сумдуудад өвөлжиж байгаа 29 өрхөөр сумын ИТХ-ын даргаар ахлуулсан ажлын хэсэг малчдаар орж өвөлжилтийн байдалтай танилцаж гарын бэлэг өгч, малчдынхаа санаа бодлыг сонсож ажиллалаа. Ажлын хэсэгт багаас сонгогдсон ИТХ-ын төлөөлөгчид оролцлоо. Мөн Өвөрхангай аймгийн Уянга, Тарагт, Гучин ус, Төгрөг, Богд сум, Дундговь аймгийн Сайхан овоо сумдаар өвөлжиж, хаваржиж байгаа 29 өрхөөр орж малын шилжилт хөдөлгөөний талаарх мэдээлэл, малын гоц халдварт шүлхий өвчнөөс урьдчилан сэргийлэх зөвлөмж анхааруулга, мөн өрхийн мал сүрэгт галзуу өвчнөөс урьдчилан сэргийлэх вакцин хийж, өвөлжөө бууцыг нь ариутгаж халдваргүйжүүлэх ажлыг Түйн дэлгэрэх мал эмнэлгийн их эмч, Тэргүүлэгч, төлөөлөгч А.Мягмар, сумын хурлын Тэргүүлэгч, төлөөлөгч Р.Эрдэнэбат, малын бага эмч Цогтоо нар хийж гүйцэтгэлээ.