Хонгор нутгийн алтан босго, Ламын гэгээний ариун голомт Өлзийт нутгийн сурталчилах өдрийг товлосон хугацаандаа сумын ИТХ, ЗДТГ, төрийн болон төрийн бус байгууллагууд, аймгийн нутгийн зөвлөлийнхөнтэй хамтран зохион байгууллаа. Хөтөлбөрийн дагуу баганат талбайд нээлтийн арга хэмжээг 9 хөлөгт баатар сумын тугийг залан ирж хүндэтгэлтэйгээр байрлуулан эхэллээ. Сумын ИТХ-ын дарга С.Гонгор, сумын Засаг дарга Д.Цэдэнсодном, аймгийн ИТХ-ын дарга Ц.Отгонбаяр, аймгийн нутгийн зөвлөлийн дарга Д.Амарсанаа нар хүрэлцэн ирсэн зочид, ард иргэдэд хандан мэндчилгээ дэвшүүллээ. Тус сумын харьяат МУСТА, Үндэсний их театрын дуучин, "Universe Best songs", "Авьяаслаг Монголчууд"-ын шилдэг оролцогч Пүрэвцэрэнгийн Баярмагнай, язгуур урлагийн "Хөх тэнгэр" хамтлаг ая дууны түрлэг өргөлөө. Аймгийн хөгжимт драмын театрт Ламын гэгээний түүх соёл, баг байгууллагуудын танилцуулга үзэсгэлэн, "Өлзийтөд үйлдвэрлэв" үзэсгэлэн худалдааг зохион байгууллаа. Шашин урлагийн цэнгүүнийг үргэлжлүүлэн явууллаа. Цэнгүүнд Гон-Гандан дэдлэн хийдийн хамба лам Б.Баянжаргал, Таравлан хийдийн их гэсгүй, гэвш Ч.Гантулга, сумын Доржинчангийн хурал хийдийн тэргүүн С.Ганбат нарын бүрэлдэхүүнтэй лам нар Хонгор нутгийн зон олон, малчид ард иргэдийг 2017 оны тахиа жилийн өвлийг өнтэй давах, зуд турхангуй, өвчин зовлонгүй, олз хийморьтой байхыг ерөөн Зод лүүжин, Дашинчирэвийн сан, даллага, хийморийн сан, Цэнд-Аюуш зэрэг номыг айлтган уншлаа. Урлагийн цэнгүүнд тус сумаас төрөн гарсан язгуур урлагийн "Хөх тэнгэр" хамтлаг, МУСТА Ж.Пэрэнлэй, Хилийн цэргийн 0151 дугаар ангийн хошууч, МУСТА Ж.Түвшинжаргал, МУСТА У.Болдбаатар, МУСТА Г.Батжаргал зэрэг аймаг, сумын ардын авьяастнууд ая дууны түрлэг өргөлөө. Тус сумын уугуул аймгийн начин Б.Ишжанцангийн нэрэмжит үндэсний бөхийн барилдаан спорт хороон дээр болж 32 бөх уран мэхийг уралдуулан хүчийг үзэн барилдсанаас аймгийн начин Э.Амгаланбаатар түрүүлж, аймгийн начин А.Эрдэнэмөнх үзүүрлэн, аймгийн начин Т.Түмэнбаяр шөвгөрлөө. Ийнхүү бөхийн барилдааныг аймгийн начин Б.Ишжанцангийн үр хүүхдүүд ивээн тэтгэн явууллаа. Аймгийн начин Б.Ишжанцанд сумын ИТХ-ын дарга С.Гонгор, сумын Засаг дарга Д.Цэдэнсодном нар хүндэтгэл үзүүллээ. Ийнхүү Өлзийт нутгийнхан сум сурталчилах өдрөө өргөн дэлгэр тэмдэглэснийг аймгийн ИТХ-ын дарга Ц.Отгонбаяр, аймгийн Засаг дарга Г.Батжаргал нар сайшаан өндрөөр үнэлэн тус суманд "Фургон" машин өгөхөөр боллоо.